شنت الستايلست ريم العدل هجوما شرسا على المخرج سامح عبد العزيز عبر صفحتها على موقع التواصل الاجتماعى فيسبوك بسبب رده على المخرجة كاملة أبو ذكرى والتى هاجمت المخرج بعد ان ظهر اسمه على تتر مسلسل “زى الشمس” والذي اعتبرته جانبا من التعدي على حقوقها حيث قامت بتصوير جزء من العمل واعتذرت عنه بسبب خلافات مع شركة الانتاج.
وقالت ريم : “انا كان نفسي ما فتحش الموضوع ده خالص وكنت والله فرحانة لأصحابي الممثلين اللي الناس طايرة بيهم وبأداءهم وشكلهم ولبسهم حتي لو الكردت راح لحد تاني بس بيني وبين نفسي انا عارفة ان ده شغلنا اللي تعبنا فيه.. وقلت هسكت خالص مش هتكلم.. بس صحيت النهاردة علي بوست من الاستاذ سامح عبد العزيز عدي كل التوقعات..!!”.
وأضافت ريم قائلة : “يا أستاذ سامح الزمالة ليها احترامها ولو حضرتك كنت كلمت الاستاذة كاملة قبل ما تدخل مكانها ما كنش حد زعل ولما الناس سقفت على الحلقات اللي هي عاملة ٩٥٪ منها كنت حضرتك رديت قلت ده شغل كاملة لحد دلوقتي والشكر ليها كنّا سقفنا لحضرتك واحترمنا أدبك واحترامك لزمايلك وشغل زمايلك وكنا اتمنينا لك من كل قلبنا تكمل الحلقات بنفس المستوي والله.! طبيعي ان دمها يتحرك لما شغلها يتسقف لحد تاني عليه لكن مش طبيعي ان حضرتك تكتب بوست زي ده علي زميلة.. انا عندي ذهول من الطريقة حقيقي!”.
إقرأ أيضاً ...
وأوضحت ريم قائلة : “أستاذ خالد عزام قبل ما يروح مكاني في المسلسل كلمني وقال لي لو مش عايزاني اروح مش هروح عشان راجل بيحترم شغله ومهنته وزمايله وأنا بالمناسبة أصغر من أستاذ خالد ده أستاذ من قبل ما انا ادخل الشغلانة بس هو تعامل معي بكل أدب واحترام مش عشاني بس عشان أخلاق واحترام اتربينا عليها في المهنة دي من واحنا صغيرين”.
وتابعت “ريم”، قائلة: “بالمناسبة يا أستاذ من سنتين كده كنّا بنعمل فيلم اسمه حملة فريزر مع الاستاذ كريم العدل وحصل مشكلة مع كريم ومشي وكلموا حضرتك عشان تيجي تكمل وحضرتك روحت برضه ومارفعتش سماعة التليفون علي كريم يمكن عشان هو مخرج صغير وحضرتك طبعًا مخرج كبير ربنا يوفق حضرتك وربنا يديك علي قد احترامك لمهنتك وزمايلك”.
وترجع الواقعة إلى ان المخرجة كاملة أبو ذكرى كانت تتولى مهمة إخراج مسلسل “زى الشمس” والذى يقوم ببطولته دينا الشربينى ولكن بعد فترة من التحضير وتصوير عدد من الحلقات الاولى قررت كاملة الاعتذار عن المسلسل بسبب خلافات شديدة مع الانتاج وتحديدا مع الفنان عمرو دياب ودينا الشربينى كما رفضت كاملة ابو ذكرى ان تضع اسمها على الحلقات التى قامت بتصويرها ولذلك قررت الشركة الاستعانة بالمخرج سامح عبد العزيز لينقذ الموقف.
ونشب خلاف حاد بين المخرجين بسبب بعد ردود الفعل التي تلقاها العمل واتهمت المخرجة كاملة أبو ذكرى “سامح” بالتعدى على حقوقها وهو ما دفع سامح بالرد عليها رافضا كل الاتهامات التى سردتها كاملة ابو ذكرى.