من أهم منشورات الفيس
عبير صلاح : انا بحمد ربنا اني ما كنتش طفلة مسيحية !
يعني إيه ؟
طفل صغير كل حصة دين ياخد كتابه ويخرج برة فصله في البرد والمطر والحر في أي مكان علشان ياخد حصة الدين بتاعته اللي بيدرسهاله اي حد مسيحي في المدرسة .. حتى لو إداري ولا مدرس مش متخصص في الدين أصلاً !
يعني إيه ؟
ممكن يقابل زمايل .. أهلهم ربوهم على الكراهية البغيضة للأخر .. مش بيرضوا يلعبوا معاه أو ياكلوا من أكله لأنه ببساطة مسيحي .
يعني إيه ؟
يسمع السخرية على دينه بودنه من زمايله .. وهم بيقولوا عضمة زرقاء و 4 ريشة ( قصدهم الصليب ) وميقدرش يرد لأنهم أكتر منه في العدد .
يعني إيه ؟
لو بنت مسيحية .. زميلتها بتفك الحجاب قدام البنات كلها واول ما تدخل عليها تغطي شعرها .. كأنها راجل أو إنسان غريب لأنهم فهموها أنه حرام .
يعني إيه ؟
كل جمعة تسمع دعوات شيوخ جهلاء عليك وعلى اهلك .. ودعوات لتكفيرك وتستحل مالك وعرضك وماتقدرش تتكلم ( وحصل ) .
يعني إيه ؟
ممكن طائفة ارهابية تدعي الاسلام .. تهجم عليك وعلى بيتك وتقتل أهلك وتسرق محلك أو تهجرك .. من قريتك وارضك وبيتك .. ويعتدوا على اهلك من النساء ويجردوهم من ملابسهم .. وانت ساكت ومغلوب
على أمرك ( وحصل ) .
يعني إيه ؟
لو كبرت ودخلت الجيش واستشهدت في سبيل بلدك وارضك وعرضك .. تلاقي حد بيشكك في شهادتك ومستخسرها (وحصل ) .
إقرأ أيضاً ...
الحمد لله أن منح الشهادة أو منعها .. مش بإيدهم .. وفي ايد ربنا وحده .. يمنح شرفها لمن يشاء . وربنا اسمه العدل وعمره ما هيظلم زي البشر .
يعني إيه ؟
يكبر يوم ورا يوم وسنة ورا سنة سنين طويلة والكنيسة اللي بيصلي فيها مش عارفة تاخد موافقة بتجديد مبنى او حتى حمام ( وحصل ) .
يعني إيه ؟
نكون بنصلي في عيدنا وناس تفجرنا بمنتهى السهولة باي غرض ديني أو سياسي .
أقولكم على حاجة . انا بحمد ربنا إني ما كنتش طفلة مسيحية .. مش علشان الاسلام على حق و المسيحية ﻷ .
ﻷ خااالص
مش كدة .. لان ربنا هو اللي هيحكم بين البشر يوم القيامة . لكن علشان ما أمرش باللي مر بيه اي طفل مسيحي .
انتوا عارفين مين اللي قالقني من كتابة البوست دة ؟؟ مش المسلمين المتشددين لا خالص .
انا
خايفة من المسيحيين الوطنيين المخلصين الجدعان اوي .. اللي ممكن يتهموني اني بجدد جروح تضر بأمن الوطن في الفترة الحالية .. وان دة مش وقته .. هم دول اللي انا عاملة حسابهم .
وبعتذر لهم لانهم عندهم حق .. بس دي كمان شهادة حق وكانت لازم تتقال .
لازم يعرفوا ان لهم اخوات حاسين بيهم وبمواجعهم وبيطبطبوا عليهم ويقولوا لهم جرحكم جرحنا ومعانتكم وجعتنا .
ياريت
نتحمل اخواتنا لو يوم غضبوا لدم ولادهم .. واخواتهم اللي سال يوم عيدهم .
وفقدوا احبابهم حتى لو جرحونا في غضبهم لازم نتحملهم .
لو موقفناش جنب بعض واتحملنا بعض في الازمات هنقف ونتحمل امتى ؟؟ حط نفسك مكانهم هتلاقيهم اهدى واحسن منك كمان لو كنت انت في مكانهم .
ليتنا
جميعا نصلي نفس الصلاة ونردد معا نفس الدعاء رددوا جميعا معي وبصوت مرتفع مسيحين ومسلمين
فلنقل جميعا :
“لكِنِّي أَقُولُ لَكُمْ أَيُّهَا السَّامِعُونَ: أَحِبُّوا أَعْدَاءَكُمْ، أَحْسِنُوا إِلَى
مُبْغِضِيكُمْ، بارِكُوا لاَعِنِيكُمْ، وَصَلُّوا لأَجْلِ الَّذِينَ يُسِيئُونَ إِلَيْكُمْ” آمين .
وقال
الله في كتابه العزيز
وَلَتَجِدَنَّ أَقْرَبَهُمْ مَّوَدَّةً لِّلَّذِينَ آمَنُواْ الَّذِينَ قَالُواْ إِنَّا نَصَارَى ذَلِكَ بِأَنَّ مِنْهُمْ قِسِّيسِينَ وَرُهْبَانًا وَأَنَّهُمْ لاَ يَسْتَكْبِرُونَ” صدق الله العظيم.
حفظ الله مصر واهلها المسيحيين والمسلمين فنحن جميعا اخوة ابناء وطن واحد .
” عبير صلاح “