عفوا فضيلة الشيخ ..قلنسوة الراهبات ليس حجاب

لا استنى وإهدا بس شوية …كفاية غش وتضليل بسبب قلة الفهم والمعرفة … فمش كل ماتتزنقوا وتقعوا في لغط وجدال مش لاقيين له أساس تتفقوا عليه تروحوا تفتشوا في المسيحية عن حاجة تشبطوا فيها علشان تثبتوا لأتباعكم من البسطاء أنكم صح بفرضية الحجاب …طيب واحنا مالنا ياجندي … طيب ماهو الرهبان بيلبسوا نفس الزي …محجبين دول كمان …وبرضه واحنا مالنا ياجندي مافيش حجاب في المسيحية قولا واحدا لا من قديم ولا دلوقت… وزي الرهبان بكل الطوايف المسيحية مالوش اي علاقة بالحجاب دا خالص حتى اللفظ نفسه ما نعرفوش … فإحنا مالنا بقا ياجندي … بعض معرفة لحضرتك …طريق الرهبنة بكل الطوائف المسيحية الجميلة هي اختيار شخصي حر تماما مدعوم بدعوة إلهية واضحة جدا …فمش أي حد تطلع في دماغه يعني … ولا حد بيأثر على حد حتى رأس الكنيسة مايقدر يقنع أي انسان بالرهبنة اللي هي حياة التجرد والتبتل …يتخلى الراهب بكامل رغبته عن حياة العالم للتكريس للصلاة والخدمة ومواصلة عمل الحب والتفاني والعطاء البهجة والرحمة لكل إنسان من دون أي مطمع في شيء إطلاقا … زي ما المسيح عمل على الارض بالظبط …وليها إختبارات شاقة وتدريبات طويلة وصعبة جدا ولمدة سنين…بتكون فيها تحت التدريب والدراسة والتعلم العميق … الرهبنة أعمق وأوسع من اختزالها في شكل أو لبس … حاجة كمان مولانا …مافيش رهبنة من غير شغل …تفاني في التعليم و الصحة وفي الخدمة المجتمعية الإنسانية الهائلة واعمال مهولة كتير من غير سرد لتفاصيلها يكفي بس نقول مدارس الراهبات وأظن دا واضح للجميع …دا غير التفرغ لكتابة أقوى وأروع وأعمق وأعظم مايمكن أن يدون في كتب بالعالم كله ..يتهافت عليها حتى الأحباب المسلمين لعظمة وصدق اختبارتها الإنسانية والحياتية والفلسفية المذهلة … .ياريت حضرتك بامولانا تسأل وتطلع على أي منها.. متوفر على فكرة … وهاتفرق معك جدا .. ليه بقول الكلام دا يامولانا علشان تعرف أن المقارنة من أساسه ماتنفعش خالص … عاوز تقارن لحتى توصل بحتمية إقناع المحجبات بالحجاب بالفرض يبقى خللي المحجبات يجربوا يسيبوا بيوتهم وأزواجهم وأولادهم وأموالهم ومباهجهم ومناصبهم وزينتهم ومشاعرهم وأطماعهم ويعيشوا يوم واحد بس من عيشة الراهبات.. بس كدا .. .وهانروح بعيد لبه قارن نفسك بالرهبان وقولنا إيه رأبك بصدق … فبلاش الطلعة دي يامولانا واسعة أوي صدقني علشان خاطر ماتجرش وراك الناس البسيطة اللي مش عارفة ويتسمع لك وتصدقك … وللعلم لك ولغيرك اتعلم حاجة جديدة تطلع بيها في الفيديو الجاي تبان كأنك مثقف …ما اسمهوش حجاب …اسمها قلنسوة في الطائفة القبطية …وليها شكل وتصميم خاص ب ١٢ صليب على الجانبين وصليب واحد كبير يشير للسيد المسيح له كل السطان والمجد …عرفت ليه بقولك واحنا مالنا بالموضوع أصلا… فتش صح واتعلم وأسأل … علشان ماتضل وتخنق الناس ..وكلنا بنتعلم ..