إقرأ أيضاً ...
يَا مَطافي يا بَطيئهْ …!
– قصيدة ألم من وحي حريق كنيسة إمبابة. 
يَا مَطافي يا بَطيئهْ
هو فرعك مُخترقْ؟
اسرعي طفّي الحريقهْ
دي الكنيسهْ بتتحِرِقْ
جوَّه منها أرواح بريئهْ
م الحياهْ دي بتتسرقْ!
المسافة تلاتْ دقايق
مش سفريَّهْ للصعيد!
وانتوا يعني بتوع حرايق
ولا يعني بتوع حديد؟
بعد ساعه ونص جايَّهْ
قد إيه حالتك تعيسهْ
ماشيه تتمخطر شويّهْ
ما الحريقه ف الكنيسه!
مش مُهم نشد حِيلنا
كارثه يعني وراح تفوت
شفت كام كارثهْ يا جيلنا؟
كام يا أم الدنيا موت؟
عزّي إنت يا رب وارحم
سبنا ليك الرَّد كله
إنت عادل مش بتظلمْ
أمرنا ده إنتَ حِلُّهْ
يا بلد فسادها عششْ
النفوسْ تِعْبِتْ خَلاصْ
طول ما حال النَّاس مطنّش
ربنا عنده الخلاصْ
وتعزياته للحزانى
وشفاهْ للمصابينْ
هو في الضيقات معانا
هو ده الحَي المعينْ …
ولم تنتهِ بعد…؛
– 
د. هاني ر. صموئيل
د. هاني ر. صموئيل١٤ أغسطس ٢٠٢٢